Adlis n tmedyazt n Yusef Ḥemmu
Amedyaz yessefran tillufa
I yennayer nni yezrin i mlaleɣ nek d umedyaz Yusef Ḥemmu di taddart n Buṣwaṛ taɣiwant n At Ɛissa Mimun. Ufiɣt yessers-ed adlis-is n tmedyazt i d yessuffeɣ isemma-yas Tillufa, ladɣa yefka-yi-d yiwen d tarzeft ttnemmireɣt s waṭas. Ihi asmi i t ɣriɣ ufiɣ degs tamedyazt icebḥen s waṭas, d tamedyazt yessɛan azal d unamek. Ladɣa mi greɣ tamawt di tezwert n wedlis iḍṛisen-is ad naf kemmlen degs tutlayt yessden yeččuṛen ur yelli kan d tutlayt fesusen i yesseqdac, iban d yiwen umedyaz yefkan azal i wayen i d yettaru. Ladɣa yenna ɣef tmedyazt: “tamedyazt d taẓuṛi n tmeslayt. D nɣec ɣef tefyar akk d wawalen i wakken a d inin ugar n wayen i d qqaṛen deg umeslay n yal ass...”. Ma deg isefra-s yenna:
Lliɣ d inigi am tili
Mi d tennunet tdukli
Ger sin ur nemyusan
S tira kan ɣef lkaɣeḍ
Ya ta tessawal i tayeḍ
Zrin wuḍan d wussan
Tamussni tuɣal tenerna
Yal wa i wayeḍ yenna
A nemagger usan yefsan...
Di tutlayt d tjeṛṛumt yewwi-d abrid d amaynut, yesseqdec isekkilen n Mɛemri, amedya am ‘tt’ netta yettaru-tt s ‘s’ s ddaw ‘t’, daɣen ad naf yessekcem-ed ‘v’ deg umkan n ‘b’, ad naf yura s webrid n tfunitit. Yella kra n wemgirred ɣef akka nettaru tura. Maca win yuran adlis d netta i d amaziɣ n tidett, tegwra-d tira taswiɛt-a yal wa d amek yettaru, abaɣur n tutlayt d asuffeɣ n yedlisen s waṭas, ma d ugur n tira cwiṭ cwiṭ ad yuɣal ad yefru.