Isallen izerben
💥💥💥💥💥💥💥💥💥💥💥💥💥💥💥
Tudrin iqeddcen di tizi n ṭiq
Asqamu n taddart n Tzelmat n Izarazen bedden i leqdic ttnejmaɛen mgal aṭan amaynut ineṭḍen coronavirus, ad naf siriden yal tikelt iberdan n taddart εawnen agad yenxeṣen seg imezdaɣ, suddsen liḥala akken iwata akken ad sḥebsen aṭan, am akken gan taywalt anda sefhamen i lɣaci akken ad qqimen deg ixxamen ur d tteffɣen ara, am akken i ywata s-umata ad gen. Ad sen yefk Ṛebbi tazmert ɣef nutni i yegren afus . 03/yebrir/2020
Isquma n tudrin d wugur n coronavirus
Awfan isquma n tudrin a d fken afus di teswiɛt agi iṣaɛben n coronavirus, ad bedden ɣer leqdic ma yella-d kra, nessarem anagar lxiṛ, amedya ad bedden akken iwata ɣer usizdeg s tarda n iberdan d yexxamen n tudrin akk d kra n imukan deg ttɛeddin lɣaci, zemmren ad gen taywalt anda ara sfehmen i lɣaci amek i ywata ad ddun di tallit agi n waṭan ineṭḍen, zemmren ad ɛiwnen ma yella-d win yenṭeṛen neɣ yewḥel akka ɣer zdat. Akken i k qqaṛen deg inzi "di ddiq i d yettban yal cci", maca di litteɛ yal yiwen yezmer ad iḍebbeṛ aqeṛṛuy-is. 27/meɣres/2O2O
Qqaren deg inzi at zik yettidiren s tmussni d termit: "aḥader yerra leqḍeɛ". Ihi, qqimet deg wexxam ur tteffɣet ara s waṭas d tagi i d tarrayt ara yesbedden aṭan agi n coronavirus, ur tettut ara tarda n ifassen s ṣabun yal anekcum ɣer wexxam. Ma tḍaqem nadit tiɣawsiwin s wacu ara tedhum. Nessarem aṭan-a ad yeḥbes.
Aṭan n coronavirus atan yessaweḍ armi d 15700 n wid yemmuten deg umaḍal s-umata, timura i yḍuṛ s waṭas am Ṭelyan d Spanya, niqal di Cinwa ansi i d yebda yeṛɛed ar deqqal din-a yeḥbes imi bedden ɣer udawi-ines d leḥbis deg yixxamen. Di tmurt n Ṭelyan imi ur bedden ara ɣef uḥader, ahat stehzan kra yuɣal yeṛɛed s waṭas, iteddu seg wa ɣer wa armi yeḍṛa uxeṣṣaṛ s tmettant yesssaweḍ armi d 5000 n yimettnen, ttmettaten yemdanen am yizan deg umenṭaḍ. Netta, aṭan-a yessɛa tafada n 14 n wussan, ddwa ur yessɛi ara di tallit n yimira maca, ddwa-ines d asebɛed fellas, tarda n ifassen s waman d ṣabun, yelha-yas diɣen lalkul, asebɛed n lmitra ger yemdanen, akka yezmer ad iɛeddi d ubrid-is. Tura azal n imeslifeḍ(amelyaṛ) n yemdanen deg umaḍal ḥebsen deg yixxamen qquddṛen aṣaduf i d ttaken imassanen di taɣult n tdawsa mgal aṭan amaynut 19 , timdinin n tmura deg umaḍal di fṛansa neɣ di spanya neɣ di yal tamurt uɣalent xlant ala aḍu degsen yettṣeffiṛ, yeɣli-d usigna d leḥzen d tugdi ɣef yal amdan yal wa yettṛaǧu ad yezri waṭan. Yella usirem acku, yal ugur yessɛa tifrat, akken qqaṛen “meskud ur nemmut rebḥ ur ifut”. Amussnaw yettḥadar, tamussni d aḥader s timad-is! Neɣ akken qqaren imezwura: "lemḥadra terra leqḍaɛ". 24/meɣres/2O2O
Nesla d akken di tɣiwant n Tmizar yella-d usexdem n tarda n iberdan s ddwa i wqeṛṛeɛ mgal aṭan n coronavirus di tudrin anda llan aṭas n imezdaɣ maca, cɣel-a ur d yell’ara deg webrid-is, llant tudrin ur d ɛeddan ara syen. Imezdaɣ la cetkayen ɣef cɣel agi, awfan cɣel am wagi yelhan d aqeṛṛeɛ ɣef waṭan a d yili ɣef tɣiwant s-umata mačči i kra n tudrin kan. Ladɣa di tama n izarazen imezdaɣ sawalen i tesqamutt n usexdem n ddwa agi n tarda akken a d alin ad sen xedmen ula d nitni. mars/22/2020 🔥
Sbiṭar amecṭṭuḥ n Suq el ḥed Usmaεil Qasi n tɣiwant n Tmizar yemdel tibbura-s azal n dduṛt aya, s yiwen n usundad(grève) gan ixeddamen n sbiṭaṛ, suturen izerfan ɣer ddewla akken ad ten-id frun, am izerfan n ixeddamen akk d ttawilat ixuṣṣen sbiṭaṛ s timad-is. Tura akka di teswiεt agi deg yegwet waṭan, imezdaɣ n tɣiwant weḥlen ttṛuḥun ɣer tmiwa ibeεden am Wagenun d Fṛiḥa, ma di Tmizar ur yelli ula d amek ara tεeddiḍ akken a d tegeḍ taɣawsa. Nessarem agad terza temsalt a d rren i teɣri n usundad-a n sbiṭaṛ n Suq el ḥed n Tmizar ad rzun ad frun uguren yellan, akken ad tekkes cedda yellan ɣef imezdaɣ. mars/17/2020 🔥
Nettnemir s waṭas imejjayen d ifremliyen d wagaden ixeddmen di sbiṭarat ttqabalen s tebɣest nnsen imuḍan yulwan d widen yenṭeṛṛen. Walaɣ-ten di sbiṭar n Tizi bedden ɣer leqdic d umahil nnsen iwaεṛen di tegwnitt n wass-a anda teččuṛ d tugdi, ɣas gan tikmamin mgal aṭan i d yennulfan yettanṭaḍ maca, neẓṛa akw d taɣawsa iwaεṛen. Nessarem-asen aṭas n tezmert d ḥellu n imuḍan s-umata di yal amkan. mars/16/2020 💥
Aṭas n waṭanen la d ttnulfun deg umaḍal ladɣa coronavirus n wass-a di yal tamurt meqqaṛ amdan ad iḥader iman-is. Yewwi-d i wemdan ad yeḍfeṛ iberdan isefken i wḥuddu ɣef waṭan agi. Tamezwarut, ad tt yebnu wemdan ɣef tezdeg, tis snat ad yanef i waṭas n uxaleḍ d tegrurin n lɣaci amer ad yili wenṭaḍ n waṭan, tis kṛaḍ ad iḥbes iman-is deg wexxam i s yelha.💥
I lmend n wesmekti d tejmilt i yimaɛdaṛ attan Tidukla Taftilt n Tmizar a d tessuddes tafaska i wesmekti n wagad ixuṣṣen di tezmert ass n sed agi zdatneɣ 14 di meɣres deg wexxam n yidles Yusef u qasi di Suq el ḥed s yiwen wahil adelsan yeččuṛen, ad yili usarag, ad yili umezgun, ɣer taggara d tikci n warrazen. Aqla-kwen akw tettwaɛeṛḍem sɣur tidukla Taftilt n Tmizar.💥
Tajmilt i tmeṭṭut
Yewweḍ-ed 8 di meɣres ass ger wussan deg nettarra tajmilt i tmeṭṭut. Nek si tama-w a s rreɣ tajmilt s tefyirt-a n tasrit:
Erriɣ tajmilt i tmeṭṭut imi d nettat i d llsas, tameṭṭut ifehmen yessnen d nettat i d asalas ma tezra-d di tseddawit ad tt naf tecba aterras. D tamejjayt neɣ d taselmaṭ ur telli kan d tikerkas, di tmetti tessεa amkan, ma d kečč ay ungif ezzem-as! Tameṭṭut terfed tametti, d nettat i tt iṣubben, ma tettmeyyiz ɣures taktiwin yessefk a d tefk irgazen, irgazen ma teẓṛam anwi? D wid yeɣran d imussnawen...
Tamurt niqal yebda-tt-id wumcum nni i wumi nessawal "aɣurar", imɣiden yeffeɣ-iten laεqel ɣef tyerza nnsen d zerriεa, kra kra armi yewweḍ uḥussu ɣer warrac, yal wa yeqqar i wa «aseggas-a ad yeddu akk d iṭij», ussan iẓidanen a ɣ d ssegwrin s wulac ɣer taggara mi ara yadef magu... Tura akka iceṛcuṛen n tliwa neqqsen s waṭas, tiεwinin bdant ttɣarent, igwelmimen ssewḥacen s lqella n waman, attan ddaεwesu! Ulac ddaεwessu yugaren tin n uɣurar. Maca ar deqqal yefra wugur-a, tabburt n Ṛebbi werǧin teqwil, llint tewwura n igenwan ɣlin-ed waman mazal a d rnun, si sya alama d magu yeǧhedd usirem, laɣda di meɣres-a zemmren a d ssɣersen igwefran d ideflawen. Awfan ad frun akk wuguren!